ORÐASTAÐUR

Ég hugsa svo margt gáfulegt í gufunni. Í morgun malaði einn maður við annan, viðstöðulaust, og ég fór þá að hugsa um malandi menn um allar trissur, í heita pottinum, í sjónvarpinu, í útvarpinu, í hlaðvörpum o.s.frv. Samt virðist spjótum jafnan beint að konum þegar fundið er að kjaftavaðli; þær uppnefndar kjaftakerlingar og jafnvel Gróur á Leiti. Þá spyr ég: Af hverju er okkur ekki jafn tamt að tala um kjaftakarla (það finnst ekki einu sinni í orðabók) og hvar er hann Gvendur á Leiti? (Ég geri mér þó grein fyrir að það sé full seint að spyrja Jón Thoroddsen)

Myndin er fengin af Kvikmyndavefnum