ORÐASTAÐUR

Öll skáld

hljóta á einhverjum tímapunkti

að yrkja ljóð

um útlandið.

Brjóta af sér hlekki

þjóðrembunnar

reyna að vera svolítið

sigld.

Þó ekki nema

vikutíma, eða svo

heimsborgaraleg!

Þá ríður á

að opna ekki kortið í símanum

út á miðri götu

ekki einu sinni

í pissuhorni við hliðina

á vinsælum pizzastað.

Þá lítur þú nákvæmlega eins út og túristarnir

sem þú þreytist ekki á að agnúast út í

heima á Íslandi.

Og þó að það sé kalt

á berlínskum götum

og hjólreiðafólkið frekt

á plássið

þá nýtur þú göngunnar

því þú ert jú í Berlín

og veggjakrotið er á þýsku.

Þú ferð samt inn á íslenska veðurvefinn:

Hvernig ætli viðri heima?

Er ég að missa af þurrum vindsveipnum

sem smýgur ekki inn að beini

eins og sá þýski?

Ég sýg upp í nefið

og nýt þess að vera í Berlín.